VOV4.Xơ Đăng - Kơxo lơ 24/1, pôa Nguyễn Phú Trọng, Kăn xiâm pơkuâ hnê ngăn Đảng pơkuâ xiâm khu râ kăn pêi cheăng Tơnêi têa hiăng vêh lăm pôu, rơkâu Têt Đảng ƀô̆, khu râ kăn pơkuâ ƀă kuăn pơlê kong pơlê Bắc Ninh. Xông tơpui a roh pêi cheăng, pôa Nguyễn Phú Trọng pơkâ thế kong pơlê Bắc Ninh kal pơtối tơkŭm hlê plĕng pêi pro tơdroăng, pơtâng tối trâu hơngế Pơkâ Hneăng hôp má XIII dêi Đảng ƀă Pơkâ hneăng hôp roh má XX Đảng ƀô̆ kong pơlê, pro ăm tơdroăng pơkâ hlê plĕng trâu hơngế tung tâi tâng Đảng, tâi tâng kuăn pơlê, pro ăm rêm ngế hlê plĕng tŭm, trâu hơngế roh tơ’lêi kal thế rĕng châ ‘nâi, mơnhông mơdêk; mâu tơdroăng pá puât, pơloăng mơnúa kal thế mơ-eăm tơkâ hluâ.

 Pôa Nguyễn Phú Trọng, Kăn xiâm pơkuâ hnê ngăn Đảng lăm pôu ƀă pêi cheăng a kong pơlê Bắc Ninh

Ôh tá chiâng tơngôu, môi tuăn dêi tơdroăng hiăng châ tơƀrê. Đảng ƀô̆ kong pơlê kal thâ séa ngăn mâu tơdroăng hiăng pêi châ tơƀrê, mâu tơdroăng tá hâi pêi châ tơƀrê, vâ ing mê, pêi pro nhên troăng pêi la ngiâ, pơkâ xiâm, hnoăng cheăng châ tơƀrê mâu tơdroăng pêi, mâu pơkâ pêi, tơdroăng tơkêa bro ƀă hiâm mơno khŏm mơ-eăm hên tâ, pêi kơtăng, ó rơdêi tâ, mơnhông mơdêk mâu tơmeăm ki ai hlâu vâ mơnhông mơdêk, ki tơ’lêi hlâu dêi kong pơlê.

A Sa Ly tơplôu ƀă tơbleăng