VOV4.Xơ Đăng - Kơxê ƀă kong măng lơ 18/11, pôa Bùi Văn Cường, Ngế cheăng tíu xiâm Đảng, kăn xiâm chêh tôm xo rơkong Kuô̆k hô̆i, kăn hnê ngăn Ƀơrô cheăng Kuô̆k hô̆i rơtế ƀă khu kăn ki pêi dêi hnoăng cheăng hiăng veăng a Hâi tơrŭm tâi tâng hdroâng kuăn ngo ƀă vâi krâ nhŏng o hdroâng kuăn ngo Bơhnéa, pơlê Đăk Wớt Yốp, cheăm Hơ Moong, tơring Sa Thầy ƀă pêi cheăng ƀă Khu pơkuâ ngăn Đảng Kon Tum.

 
            Tơpui a rôh trâm mâ, kăn xiâm chêh tôm xo rơkong Kuô̆k hô̆i rơhêng vâ vâi krâ nhŏng o pơtối mơdêk hiâm mơno tơrŭm, pêi pro tro mâu rôh mơhnhôk ƀă tơdroăng tơ’noăng pâ nhuô̆m tơnêi têa vâ rơtế kum dêi rơpó mơnhông mơdêk cheăng kâ hơ’lêh tơdroăng rêh ối. A rôh pêi cheăng ƀă khu pơkuâ ngăn Đảng Kon Tum, pôa Bùi Văn Cường, kăn xiâm chêh tôm xo rơkong Kuô̆k hô̆i tối, phiu ro hlo tơdroăng ki hơ’lêh khât ‘na cheăng kâ, mơhno túa lĕm tro, pơlê pơla dêi kong pơlê Kon Tum tung pơla achê kố. Tơdroăng kố mơhno nhên tung tơdroăng ki hơniâp ro dêi Hâi mơdĭng tơrŭm tâi tâng hdroâng kuăn ngo dế châ tơkŭm po a lâp mâu thôn, pơlê tung kong pơlê.
Pôa Bùi Văn Cường hiăng diâp ăm kong pơlê Kon Tum 1 rơtal liăn tŏng kum kong pơlê tơbleăng hnoăng cheăng hbrâ mơdât pơreăng COVID-19 ƀă diâp 5 toăng hngêi Tơrŭm ƀă kơnâ 250 rơtuh liăn.
Katarina Nga tơplôu ƀă tơbleăng