VOV4.Xơ Đăng - Kơxo lơ 18/1, a Hà Nội, Pơxiâm po hneăng hôp roh má 7 dêi Vi ƀan pơkuâ Kuô̆k hô̆i. A hneăng hôp rôh kố, Vi ƀan pơkuâ Kuô̆k hô̆i kô hnê tối a hên tơdroăng ki kal. ‘Na tơdroăng mơjiâng luât, a hneăng hôp rôh kố, Vi ƀan pơkuâ Kuô̆k hô̆i ăm veăng hnê tối ‘na: tơdroăng tơpui nhên, tơmâng xo, ‘mâi hơ’lêh tơdroăng tơkêa luât Tơ’noăng, khĕn kơdeăn (‘mâi hơ’lêh), ‘mâi  tơ’nôm tung hlá mơ-éa luât pơkâ dêi Kuô̆k hô̆i mơnúa tơkŭm pêi cheăng, mơhno tơdroăng cheăng pêi, hnê cheăng pêi  ăm mâu ngế ki kroăng tung hngêi phak a tơdroăng mơjiâng luât, luât pơkâ hơnăm 2022; séa ngăn, pơkâ pêi pro tơdroăng tơleăng dêi Khu kăn tơleăng kuăn pơlê.

‘Na mâu tơdroăng cheăng kâ rêh ối, Vi ƀan pơkuâ cheăng Kuô̆k hô̆i ăm veăng hnê tối tơ’nôm tung pơkâ’no liăn ing kong têa ê ing kơxô̆ liăn hâi xing xoăng ƀă ‘mâi hơ’lêh, tiô pơkâ ‘no liăn cheăng mơjiâng tơmeăm khoăng tơnêi têa ton hơnăm liăn ngân xiâm tơnêi têa pơla hơnăm 2021-2025 ăm ‘na tơdroăng tơkêa dêi mâu khu xiâm, kơvâ cheăng xiâm Tơnêi têa ƀă kong pơlê (rôh má 2). Tơdrêng amê a rôh hôp mê, Vi ƀan pơkuâ cheăng Kuô̆k hô̆i  kô séa ngăn tối tơbleăng tơdroăng kuăn pơlê púi vâ khế 12 - 2021 dêi Kuô̆k hô̆i tơdroăng tơkêa bro xing xoăng tơdroăng cheăng tung khu kăn khu pêi cheăng ƀă biên chế dêi Ƀơrô Kuô̆k hô̆i ƀă tơdroăng hnê tối ‘na mơgêi rôh hôp oh tá xê tiah hmâ rôh má môi, Kuô̆k hô̆i  hneăng 15.